புனித நூல்

 தாயின் புடவையில் 
நெய்யப்பட்ட நூல்களை விடவா 
புனிதமானவை 
கீதை, குரான்,பைபிள்...

இதழிசம்

 கூட்டத்தில் பேசிக்கொண்டிருக்கையிலும்
கூச்சமின்றி முத்தமிட்டுக்கொள்கின்றன
மேலுதடும்,கீழுதடும்...

காதல்காரி(கை)

நூலினை விலங்காக்கி
பூக்களை கைது செய்கின்றாய்
நீ பூக்காரியா....!
இல்லை,
போலீஸ்காரியா...?

புதைபொருள்

ஆற்று மணலில் புதைந்து கிடக்கும் 
உனது பாதச் சுவடுகளை
சேகரிப்பதற்காகத்தான் நடக்கின்றனவோ.....?
மணற்கொள்ளைகள்.....!

தீண்டாமை

நெருங்கி வந்தும் 
எனைத் தீண்டாமல் செல்லும்
என் தேவதையே..!
உனக்கு தெரியாதா...?
தீண்டாமை ஒரு பாவச் செயலென்று....

மழலையர் உலகம்

இழுத்த இழுப்புக்கெல்லாம் 
வந்துவிடுவதால் தான்
குழந்தைகள் ஒருபோதும் வெறுப்பதில்லை....
பொம்மைகளை...

திரு விழிகள்

என்னவளே...!
உன் கருவிழிகளென்ன பூரிக்கட்டையா
இந்த உருட்டு உருட்டுகின்றாய்...

அமேசான் அழகிகள்

இதுவரை 
கடற்கரையையே காணாத
பல கிராமத்து அழகிகளின்
பாதங்களை தழுவிய பின்பு தான்
கடல்நீரை குடிநீராக்கும் திட்டம் சாத்தியப்படும்.....

சரிவியல்

அடிக்கடி சரிந்து விழுவது

சென்னை விமான நிலைய

மேற்கூரை மட்டுமல்ல

உனது துப்பட்டாவும் தான்...

நூதனக் கொள்(கை)ளை

புது மாப்பிள்ளைகளை 
கடந்து செல்லும்போதெல்லாம்
குப்பென்று வீசுகின்றது
வரதட்சணை நாற்றம்...

இடையினம்

கோவிலில் 
நடை சாத்தி வைப்பது போல்
நீ உன் இடை சாத்தி வைக்கிறாய்
எப்போது மீண்டும் கிடைக்கும்
சிறப்பு தரிசனம்...